ෆේස්බුක් ශීලය

"හෙට නම් මන් දවසම ඔන්ලයින් නෑ.සිල් ගන්න යන්න හිතාගෙන ඉන්නේ ප්රෙන්"
"උබලා මාව හෙව්වාද?සිල් ගන්න ගියා බන්."
"මම හෙට සිල් ගන්න යන්න ඉන්නෙ."
".සිල්ගන්න යන්න හිටියෙ නින්ද ගියානෙ ...
හවස ඔන්ලයින් නැත්නම් මම පන්සල් ගිහින්..."

පොහොය දිනයක් අත ලග එන විට මේ සමාජ මාධ්‍ය විශේෂයෙන් ෆේස්බුක් තුළ දැකගත හැක්කකි. මෙවැනි post නිරන්තරව තනි පුද්ගල වශයෙන් තම ගිණුම් තුල වත්මන් තරුණ පරපුර හුවමාරු කිරීම සමාජ ප්රවණාවක් බවට පත්ව ඇත්තේ සැබැවින්ම ආගමකට ද පහරක් එල්ල කරමිනි. වසරකට පොහොය 12කි. ඉන් දවසක් හෝ සිල් ගැනීම පොහොයට පන්සල් යාම තමන්ගේ අභිමතයකි. නමුත් මසකට ලැබෙන මෙම එක් දිනයත් හෑල්ලුවට ගැනීම ආගමක අනාගත පරිහානියක්.

අන් ආගමිකයන් සියලු කටයුතු නවතා මසකට දින 4 ක හෝ තම ආගම වෙනුවෙන් කැප කරති. නමුත් බෞද්ධයා ට එක් දිනයත් විහිළුවකි.


ශීලය යනු කුමක්ද?
ශීලය වූ කලී  හික්මීමයි. සංවරයට පත් කිරීමයි. ශීලයේ පිහිටීම ප්‍රශ්න නිරාකරණයට මාර්ගය යි.

"සීලේ පතිට්ඨා ය නරෝ සපඤ්ඤෝ"

මනා නුවණැත්තා ශීලයෙහි පිහිටයි. ශීලයෙහි පිහිටා සමාධියත් ප්‍රඥාවත් වඩයි. ශීලය ඇති තැන ප්‍රඥාව ඇත. ප්‍රඥාව ඇති තැන ශීලය ඇත. සිල්වතාට නුවණ ඇත. නුවණැත්තාට සිල් ඇත. මල් සුවඳ උඩු සුළඟට නො හමයි. සත් ගුණවතුන් ගේ සිල් සුවඳ උඩු සුළඟේ පවා හමයි. ශීලය තුළ ප්‍රධාන වශයෙන්ම පාපයට හා ලජ්ජාවට බිය පවතියි. ශීලය ධනයකි. සතුන් මැරීමෙන්, සොරකමින්, කාමයෙහි වරදවා හැසිරීමෙන්, මුසාවාදයෙන්, රහමෙර පානයෙන් වෙන්වූයේ වේ ද එය ශීල ධනයයි.

 සිල් සුවඳ සැම සුවඳකටම වඩා උතුම්. සඳුන් සුවඳ, මල් සුවඳ ආදී දෑ අතුරෙන් සිල් සුවඳ ඉතා අගනේය. සිල් සුවඳ දෙව්ලොව පවා පැතිරෙයි. ( ධම්ම පදය පුප්ඵ වග්ගය, 12, 13 ගාථා බලන්න ) සිල් රැකීමට කාලයක්, දිනයක්, වයස් භේදයක් නැත. ගිහියා ගේ නිත්‍ය ශීලය පංච ශීලයයි.

වාචානං සමෝධානං ශීලං
කය වචන දෙකෙහි සංවර බව ශීලයයි. සිල්වත්කම සිතෙහි ඇතිවන කෙලෙස් දැවිලි සංසිඳුවා සීතල කරන හෙයින් ශීලය යැයි කියනු ලැබේ.

ශීලය දෙවදෑරුම්ය.
1. චාරිත්‍ර ශීලය
2. වාරිත්‍ර ශීලය

චාරිත්‍ර යනු හැසිරීමයි. ගුරුවරුන්ට, දෙමාපියන්ට මෙන්ම දාගැබ්, බෝධි ආදියට සැලකීම සහ වත් සම්පන්න වීම චාරිත්‍ර නම් වෙයි.

වරදින් වැළකීම වාරිත්‍ර නම් වෙයි. වාරිත්‍රයෙන් තොරවූ විට චාරිත්‍රයක් නැත. සැලකිය යුතු අය, නො සැලකිය යුතු අය, තැන නොතැන නොදැන හිතුවක්කාරි ලෙස හැසිරෙන අය තුළ චාරිත්‍රයක් නැත.
වරදින් වැළකීමට නම්, සිත කීකරු කරගත යුතුය. පළමුව හොඳ සිරිත් පුරුදු කර ගෙන ශීලාචාර විය යුතුය. එවිට ප්‍රාණඝාතාදියෙන් වැළකී චාරිත්‍ර සම්පන්න සිල්වතෙකු වීමට පුළුවන. චාරිත්‍ර වාරිත්‍රාදී වශයෙන් ශීලයෙහි නොයෙක් ප්‍රභේද ඇත. ඒ ශික්‍ෂාපද සංඛ්‍යාව වශයෙන් සහ අංග වශයෙනි.
ශීලයෙහි ප්‍රභේද
1. පංච ශීලය
2. අෂ්ඨාංග ශීලය
3. බ්‍රහ්මචරියා පංචමක ශීලය
4. ඒක භක්තික ෂට්ක ශීලය
5. ආජීවාෂ්ටමක ශීලය
6. දශ ශීලය
7. සාමණේර ශීලය
8. උපසම්පදා ශීලය යනුවෙනි.

ඉදින් මෙවන් වූ ශීලය තරුණ පරම්පරාව මෙලෙස හෑල්ලුවට ලක් කිරීම අගනේ ද? සංවර බවින් තොර වූ ශීලයක් නොමැත්තේය. ඉදින් තමාට දෙයක් කළ නොහැකි විය හැකිය. එසේ නම් එය සමාජ මාධ්‍ය තුළ අන් කෙනෙකුගේ දර්ශනයක් හෑල්ලු කිරීම ගැළපේද?